Nga Rush Dragu – me pak humor politik

Dëgjojmë nëpër të gjitha kancelaritë që bëhet thirrje për ndërhyrje dhe përdorim proporcional force nga policia kur protestuesit përdorin dhunë.

Pra, me e thënë shqip e me e kuptuar fshatari e katundari: Policia të përdorë “dajak” proporcional!

Hajde Zot e merre vesh këtë lloj dajaku që i shtohet fjala proporcional. Pra, një dajak:

sa një grimcë,

sa një çikë,

sa një fije…

Me pak fjalë: një dajak për të thyer një këmbë e një krah, apo për të shtypur kokën, por ama… në mënyrë proporcionale!

Gazin lotsjellës ta përdorin përsëri në mënyrë proporcionale — si puna e dajakut. Të përdorin gaz që nuk dihet se kush e ka prodhuar, kur është prodhuar apo në çfarë shkalle duhet përdorur.

Po ndaj fëmijëve ky “dajaku” proporcional si do të funksionojë, aman të na e thotë dikush? T’i rrahësh fëmijët me dajak proporcional?! Hej dreq, sa do të jetë ai “proporcional”? Të të rrahin e të mos kesh mundësi të çohesh në këmbë, por kjo rrahje të quhet “proporcionale”, eëë?

Qëndruan katër muaj në protestë proporcionale dhe nuk ua pordhi kush nga pushteti se pse kishin dalë e çfarë kërkonin.

Po këta të qeverisë, a kanë vjedhur me dajak proporcional, bre? Se protestën e duan proporcionale, kurse vjedhjen e duan me dajak joproporcional!

Po me qëndru në karrigen e pushtetit, a duhet me ndejt në mënyrë proporcionale? Po me nxjerrë kunjin Kryeministri me popullin, a duhet ta nxjerrë në mënyrë proporcionale apo me dajak proporcional?

Nuk e di…

Ju që jeni të lidhur aq shumë pas Kryeministrit, ishalla hani edhe ju ndonjë dajak proporcional në emër të stabilitetit dhe ruajtjes së karriges së Edi Ramës!

A ka proporcionalitet edhe thënia dëshpëruese e Edi Ramës:

“Mirë se po e lëshoj, po kush po e merr?!”

Pika i raftë PS-së në qoftë se nuk ka edhe një tjetër si Edi — i cili nuk e ka provuar “proporcionalitetin e qeverisë” me mandate të panumerta për ta zëvendësuar atë lanet!