Real Madrid dhe Barcelona do të përballen nesër në mbrëmje në orën 20:00 në finalen e Superkupës së Spanjës. Trajneri Karlo Ançeloti ka dalë në konferencën e zakonshme për shtyp ku theksoi se skuadra është e qetë dhe gati për trofeun e parë të këtij sezoni. Italiani ndër të tjera tha se bëhet fjalë për një ndeshje që e shijon dhe e pret me padurim e gjithë bota.
“Skuadra është mirë dhe shumë pozitive para kësaj ndeshje, energjitë janë të rikuperuara. Jemi gati për finalen, bëhet fjalë për titullin e parë të sezonit dhe kjo është një ndeshje që e shijon e gjithë bota. Në një ndeshje si kjo ndaj Barcelonës nuk mund të mendoj se kush do të jenë lojtarët që do t’i aktivizoj nga stoli përgjatë ndeshjes, sepse bëhet fjalë për një takim shumë dinamik dhe gjithçka ndryshon nga minuta në minutë. Unë i besoj shumë të gjithë lojtarëve që kam në stol, e di që janë të përgatitur.
Superkupa është një titull i rëndësishëm për imazhin e klubit. Në “El Clasico” nuk ka favorit, edhe pse në këtë moment, Reali mund të jetë disi më mirë. E respektojmë Barcelonën, na mundi vitin e kaluar. Çavi po bën një punë të shkëlqyer edhe pse nuk ka eksperiencën time sepse ai është ende shumë i ri. Ka një rritje të vazhdueshme dhe e ndihmon sigurisht eksperienca si një ish-mesfushor. E ndihmon vizioni që ka për futbollin”, përfundoi Ançeloti.
PANORAMASPORT.AL